Coñecendo ás protagonistas dos premios a “Mellor experiencia docente”

Seguro que lembrades que o pasado mes de maio entregamos dous premios e un accésit a “Mellor experiencia docente” no marco das V Xornadas de Innovación Docente.

Desde a Unidade de Teleformación do CUFIE, quixemos saber un pouco máis sobre esas tres experiencias, así que collimos a cámara e o equipo e alá nos fumos ás tres facultades correspondentes para entrevistar ás súas protagonistas e que nos contaran de primeira man os detalles do traballo que desenvolveron.

O resultado foron varias horas de gravación que tentamos resumir en tres pequenos vídeos. Pensamos que o resultado permite facerse unha idea máis clara dos interesantísimos proxectos que se levaron a cabo. Agardamos que vos gusten!

1º PREMIO: Nonna mi raconti: Historias dunha influencer nonaxenaria na aprendizaxe do italiano

2º PREMIO: A Universidade Sénior: Derribando barreiras e estereotipos en tempos de COVID

ACCÉSIT: Metodoloxías activas na formación inicial do profesorado en orientación, titoría e diagnóstico

V Xornadas de Innovación Docente. Valoracións e resultados

Os pasados 27 e 28 de maio celebramos en formato virtual as V das Xornadas de Innovación Docente e, coma todos os anos, queremos compartir con vós os resultados e impresións.

Esta edición tan especial, celebrada baixo o lema A nova normalidade académica: leccións aprendidas e retos de futuro, tivo unha acollida que nos sorprendeu gratamente. Pero vexamos os datos antes de sacar conclusións:

O programa

A organización do programa supuxo un reto importante debido á falta de presencialidade. A nosa intención foi dar o maior protagonismo posible ás persoas participantes. É por iso que tan só houbo un relatorio plenario, mentras que o resto do tempo repartiuse de xeito que se outorgase un papel activo aos asistentes mediante mesas de debate, obradoiros prácticos e vídeo-comunicacións.

A secuencia temporal destas xornadas foi novidosa tamén, pois tivo unha fase asíncrona durante a cal se elaboraron, compartiron, visualizaron e votaron as achegas en formato vídeo-comunicación e unha fase síncrona durante as mañáns dos días 27 e 28 para o desenvolvemento dos distintos eventos do programa.

A participación

Esta edición resultou ser unha das máis numerosas en canto a participación e asistencia, con un total de 216 persoas inscritas e de 60 video-comunicacións presentadas. Cabe destacar ademais que a asistencia se mantivo constante ao longo dos dous días mesmo ata o venres a última hora, cousa que non ocorría no formato presencial.

Datos de participación V XID

O relatorio plenario

O relatorio plenario, baixo o título “Claves de la docencia en tiempos de pandemia y retos de futuro”, estivo a cargo da directora de Deusto Online, Sonia Arranz Turnes quen, como era de agardar, non defraudou.

Tal como recolle a gráfica anterior, foi a que acadou maior grao de participación e tanto a charla en si mesma coma o debate xurdido despois foron moi enriquecedores. Sonia achegounos valiosos consellos e recursos para o exercicio da docencia e da aprendizaxe en medios telemáticos.

Deixámosvos aquí a gravación da súa intervención por se queredes tomar nota dos seus interesantes consellos:

A mesa redonda

Logo do relatorio, celebrouse unha mesa redonda moderada por José A. García Naya, director do Cufie.

O debate centrouse na posta en común das principais ideas e experiencias relatadas nas videocomunicacións presentadas e tamén, supuxo unha ocasión perfecta para compartir as inquedanzas, éxitos e impedimentos que a situación de emerxencia sanitaria trouxo consigo durante estes meses pasados.

Imaxe da mesa redonda

Os obradoiros

Durante a mañá do día 28 de maio, tiveron lugar os catro obradoiros que denominamos “Laboratorios de retos”, pois estiveron organizados en torno a un reto que as persoas asistentes debían resolver por grupos coa axuda do profesorado experto encargado de cada obradoiro.

A continuación podedes ver unha pequena galería con fotos do desenvolvemento de cada un deles:

Os premios

Convocáronse dous premios á mellor experiencia de adaptación á docencia virtual: o 1º premio, dirimido por un xurado externo de expertos e o 2º premio, que decidían os propios participantes a través dos seus votos. A emoción sobre o primeiro premio mantívose ata o final e o xurado tivo bastante difícil a decisión.

Finalmente, resultou gañadora a experiencia “Nonna, mi racconti…”: historias de una influencer nonagenaria en el aprendizaje del italiano da profesora Emiliana Tucci. O segundo premio estivo moi reñido, pois ás 15:00 horas do día 27 ían empatadas a puntos dúas experiencias. Para desempatar, decidiuse acudir ás puntuacións do xurado externo resultando gañadora do 2º premio a experiencia “A Universidade Sénior: Derribando barreiras e estereotipos en tempos de COVID” das profesoras Ana I. Ares Pernas, Susana Iglesias Antelo e Matilde García Sánchez. Sen embargo, a vicerreitora Nancy Vázquez quixo premiar tamén á outra experiencia que quedou ao mesmo nivel de puntos concedéndolle un accésit. Trátase da experiencia “Metodologías activas en la formación inicial del profesorado en orientación, tutoría y diagnóstico” das profesoras Nuria Rebollo Quintela, Paula Mendiri Ruíz de Alda e Luisa Losada Puente.

Deixámosvos algunhas fotos do acto de entrega de premios, así como tamén a gravación que vos recomendamos visualizar se non puidestes no seu momento porque foi moi divertida e emotiva.

Vídeo da entrega de premios e clausura das V Xornadas de Innovación Docente

As valoracións

Tal como afirmou a vicerreitora Nancy Vázquez na súa presentación, co esforzo e dedicación de todos e todas conseguimos facer posible o que parecía imposible.

Sen dúbida nunca deixaremos de ser unha universidade presencial, pero esta crise sanitaria marcou un antes e un despois na nosa actividade académica. Bo reflexo disto é a boa acollida que tiveron estas xornadas mesmo usando exclusivamente formatos dixitais, o cal denota que definitivamente perdemos o medo ao uso de novas ferramentas e de novos contextos de aprendizaxe.

Deixámosvos cos resultados da enquisa de valoración e dámosvos as grazas un ano máis pola vosa participación e o voso interese. Agardámosvos nunha próxima edición, de seguro menos condicionada pola pandemia e en formato híbrido ou mixto, segundo a preferencia maioritaria que denotan os resultados da enquisa.

A nova normalidade académica: leccións aprendidas e retos de futuro

Baixo este lema tan significativo da era que estamos a vivir celebraremos os próximos 27 e 28 de maio a V edición das Xornadas de Innovación Docente na UDC.

Cartaz das V Xornadas de Innovación Docente

Vai ser unha edición moi especial e moi diferente ás anteriores, non só porque será totalmente virtual e con participación a través de vídeo-comunicacións, senón porque os participantes xa non somos os mesmos como docentes nin como alumno/as logo desta adaptación forzosa ao ensino en remoto. Querendo ou non, vímonos na obriga de adaptarnos e de aprendermos axudándonos uns a outros para superar os numerosos obstáculos que nos foron aparecendo nese tortuoso camiño. Por iso, porque cada un de nós ten moreas de experiencias que contar, estas xornadas van ser máis interesantes ca nunca.

Son moitas pois as leccións aprendidas e agora toca poñelas en común para non deixar de aprender e para compartir éxitos, fracasos e preocupacións polo futuro.

Pola nosa banda, preparamos un encontro distinto, onde a vosa voz como participantes teña pleno protagonismo a través de participacións en vídeo e de mesas redondas. Ademais, deseñamos un laboratorio de retos onde vos enfrontaredes por grupos, poñéndovos na pel de auténticos alumnos virtuais, á resolución de catro retos relacionados coa docencia virtual lanzados por algúns dos nosos mellores docentes dos que, de seguro, aprenderedes moito.

  • Dinamizando as nosas clases virtuais síncronas. Thais Pousada e Laura Nieto
  • Deseñando materiais didácticos accesibles. Iago Santalla
  • Diversificando a avaliación. Juan Carlos Brenlla
  • Guión audiovisual para vídeos educativos. Manuel García Torre

Teremos a sorte de contar con unha poñente de excepción para a conferencia plenaria: Sonia Arranz Turnes, a directora de eCampus, a unidade de asesoría e soporte para a formación online da Universidade de Deusto. Elixímola a ela porque é unha persoa con un coñecemento e unha experiencia moi acreditada no campo do e-learning e tamén porque estar á fronte de eCampus durantes estes meses, outorgoulle unha visión de 360º sobre as dificultades ás que se enfrontaron tanto docentes como alumnos como PAS no proceso de transformación da docencia e da aprendizaxe.

Sonia Arranz Turnes

Outra novidade desta edición é que a Vicerreitoría de Planificación Académica e Innovación Docente quere premiar a dedicación e o esforzo do profesorado mediante a concesión de dous premios ás mellores experiencias de adaptación á docencia en remoto presentadas a través das video-comunicacións. Haberá un primeiro premio dirimido por unha comisión de expertos externa e un segundo premio outorgado polos votos do público aos vídeos (podes ver as bases aquí)

Animádevos a participar! agardámosvos a todos e todas!

Pasamos revista ao 2019

Como dicía o poeta, Fugit irreparabile tempus e aquí estamos un ano máis facendo balance do andado nestes 365 días do 2019 que chegou á súa fin.

Ao igual ca todos os anos, queremos felicitarvos estas festas con este pequeno vídeo, darvos as grazas polo voso apoio e enviarvos os nosos mellores desexos para o vindeiro ano 2020:

Para nós foron meses de intenso traballo  por parte de todas as unidades que compoñen o CUFIE. Velaquí vai unha relación resumida das accións máis destacadas:

  • Desde a Unidade de Atención á Diversidade organizamos as IV xornadas sobre diversidade na UDC que este ano estivo dedicada á diversidade funcional cognitiva e na que participaron entidades tan interesantes como Plena Inclusión ou A quinta da Arte. A xornada foi de balde pero fíxose unha recollida de alimentos para a cociña económica coas aportacións das persoas asistentes.Jornadas A.C. (1)
  • Con motivo do Día Internacional das Persoas con Discapacidade, celebrado o 3 de decembro, dende a nosa universidade, encargada da coordinación do Grupo de Comunicación da Red SAPDU dentro de CRUE-Asuntos Estudiantiles, lanzamos por segundo ano consecutivo unha campaña, este ano denominada #DecalogoSAPDU, na que, a través dun vídeo, poñíase en valor o traballo de todos os servizos de atención das universidades recollendo os valores e principios que aplicamos no noso día a día. A nosa universidade foi a encargada de dar forma a eses principios e crear o vídeo.
  • Un dos nosos estudantes de prácticas deste 2019, Iván Vázquez, é moi activo nas redes e nos medios de comunicación e axudounos a dar visibilidade á Unidade de Atención á Diversidade a través dunha reportaxe da TVE para o programa “En lengua de signos“.
 
  • Un ano máis, o proxecto Espazo Compartido segue a formar a rapazas e rapaces con discapacidade intelectual dentro da nosa universidade. Este ano incorporouse a IV promoción deste proxecto, e a segunda xa como título propio da UDC. No 2019 fixemos unha Xornada Formativa de Emprego con Apoios como base para a mellora da empregabilidade do noso alumnado. espazo compartido logo

IV Xornadas de Innovación Docente na UDC. Resumo e impresións

Un ano máis queremos compartir con vós os datos e as impresións da nova edición das Xornadas de Innovación Docente que celebramos en novembro deste ano baixo o epígrafe Contextos Universitarios Transformadores: Boas prácticas no marco dos GIDs.

Dicirvos que estamos moi contentos porque a pesares de que tivemos algúns problemiñas de saúde inesperados no equipo, todo saiu á perfección grazas ao traballo inxente do resto de integrantes do CUFIE, bolseiro/as e demais colaboradore/as. Aquí podedes ver como relatou La Voz de Galicia a nova da celebración das xornadas.

inauguración-IVXID
Inauguración oficial das IV XID polo reitor Julio Abalde, a vicerreitora Nancy Vázquez e o decano da fac. de CC. da Educación, Manuel Peralbo.

  • O programa

Este ano tivemos un programa moi completo e dinámico integrado por dous relatorios plenarios, 34 comunicacións orais, 38 pósteres, 4 paneis de experiencias innovadoras, entrega de premios ApS, presentación do programa “Democratización do coñecemento” da Universidade Sénior e entrega de diplomas á II promoción do programa formativo para profesorado novel PFI.

  • O público asistente

Se ben é certo que nese aspecto sempre queremos máis, nesta edición conseguimos máis ou menos os mesmos datos de asistencia do ano anterior: preto de 200 asistentes. Aínda así, é evidente que debemos seguir traballando para acadar maiores cifras de inscritos e de asistentes.

  • Os premios á innovación en Aprendizaxe-Servizo

Outra novidade deste ano foi a convocatoria, impulsada pola Vicerreitoría de Oferta Académica e Innovación Docente, dos premios á innovación en Aprendizaxe-Servizo. O xurado, tres reputados profesores de universidades de fóra de Galicia, tivo moi difícil a escolla entre os interesantísimos proxectos que se presentaron. Finalmente, os gañadores desta edición foron:

  1. I premio (1.500€): Cartografía social do dereito ao hábitat na cidade da Coruña. Dos profesores Laura Cruz, Roberto Suárez e Juan José Bueno
  2. II premio (900€): Fisioterapia escolar nun Colexio de Educación Especial. Da profesora Verónica Robles García
  3. III premio (600€): Aprende Física e divírtete. Das profesoras Ana Ares Pernas e María José López Abad.

Parabéns!!

  • Os relatores convidados

Como novidade nesta edición, contamos con dous relatores convidados:

  1. Daniel Cassany, da Universitat Pompeu Fabra de Barcelona, falounos da súa longa traxectoria docente compartindo anécdotas e útiles consellos baixo o título Renovando materias: éxitos e fracasos da innovación docente.

danielcassany

2. Carlos Escudero, o profesor da FIC da UDC e adxunto ao reitor en materia de TIC, impartiu unha interesante conferencia sobre as novas ferramentas informáticas da UDC e as súas múltiples aplicacións na docencia.

carlosescudero.jpg

  • Comunicacións, pósteres e paneis de experiencias

Aquí vos deixamos algunhas fotos dos dous días nos que expuxestes as vosas experiencias nas aulas

O pase de diapositivas require JavaScript.

Desexando que un ano máis fose do voso agrado este encontro, velaquí vos deixamos os resultados das vosas opinións sobre as xornadas:

Moitisímas grazas a todo/as os que asististes e compartistes as vosas experiencias! Vémonos o ano que vén!

Contextos Universitarios Transformadores. Publicado o 2º número da colección

Acaba de saír á luz, baixo o lema “Construíndo espazos de aprendizaxe”, o segundo número da colección Contextos Universitarios Transformadores (CUT) .

O novo número agrupa un total de 34 comunicacións e 20 posters que foron presentados no marco das III Xornadas de Innovación da UDC celebradas o pasado mes de novembro de 2018.

Nesta edición atoparedes interesantísimas achegas de propostas innovadoras desenvolvidas nas aulas da UDC, que xiran en torno a 4 liñas temáticas principais:

  • Aplicación educativa das Tecnoloxías da Información e da Comunicación (TIC)
  • Metodoloxías Activas e Recursos para a avaliación
  • Impulso da Responsabilidade Social Universitaria
  • Xestión de centros e Colaboración entre docentes

Portada
Pincha  aquí ou na imaxe para acceder ao libro

Confiamos en que esta iniciativa sexa de utilidade tanto para a aprendizaxe e a formación do profesorado universitario como para abrir as nosas aulas á sociedade en prol do coñecemento e dunha formación universal e aberta.

Desde o CUFIE queremos dar as grazas ao profesorado da Universidade da Coruña pola súa implicación e o seu esforzo pola mellora contínua, tanto dos procesos de aprendizaxe do seu alumnado como da súa propia práctica docente.

 

 

2018. Resumo doutro ano que chega á súa fin

Remata un ano máis e quixemos despedilo con un vídeo de todo o equipo felicitándovos o nadal a todas as persoas que nos apoiades e que colaborades coas nosas iniciativas e proxectos. Grazas de corazón a todos e todas por dar sentido ao noso traballo:

Para nós foi un ano intenso de traballo este 2018 que afrontamos con ilusión, como sempre facemos con todo aquilo no que nos embarcamos. Facemos a continuación un resumo breve das nosas actividades:

  • Continuamos coa renovación dos distintos Planos de Formación que xestionamos engadindo novos cursos e ampliando a oferta de cursos en liña pola alta demanda e aceptación que teñen.
  •  Ampliamos a colaboración con outros servizos da UDC coordinando accións formativas e xornadas. Concretamente, á colaboración coa Escola Internacional de Doutoramente e co Servizo de Bibliotecas que viñamos mantendo, sumamos este ano outra co CITIC, a través dun interesante curso semipresencial que foi todo un éxito:

logo-programaformativo

  • Actualizamos a nosa web para facilitarvos a navegación e a localización dos distintos servizos que ofertamos.
  • Lanzamos a principios deste ano a I Convocatoria de MOOCs (Cursos Masivos Abertos en liña) da Universidade da Coruña nunha aposta firme por parte da Vicerreitoría de Oferta Académica e Innovación Docente pola difusión do coñecemento en aberto que dará un importante impulso á proxección internacional da nosa universidade. promocion-udcmoocsAdemais, estamos moi felices porque tivemos a honra de quedar entre os 10 finalistas ao Premio Innovación Educativa MiríadaX 2018 co noso primeiro MOOC impartido nesta plataforma: “Música para el S.XXI: Aportaciones del Software Libre a la educación musical”

portada-musicaSXXI

Neste momento estamos ultimando o seguinte MOOC que se impartirá en Xaneiro do 2019 en MiríadaX. Estade atentos porque estamos seguros de que será un éxito tamén 😉

  • Foi un ano intenso de viaxes para nós porque acudimos, en representación da UDC,a multitude de congresos e eventos relacionados coa Innovación e coa Atención á Diversidade en distintos puntos da xeografía española: Alicante, Zaragoza, Girona, Tenerife, Madrid e Murcia.
  • Celebramos a III Edición das Xornadas de Innovación Docente da UDC onde compartimos experiencias e reunimos, como novidade este ano, aos integrantes dos GIEs para poñer en común o traballo realizado no marco dos grupos. Tamén entregamos diplomas á primeira promoción de docentes noveles formados co programa bianual de formación PFI en formato integramente virtual.

  • Como resultado das vosas achegas á II edición das Xornadas, publicamos este ano o primeiro volume da colección dixital Contextos Universitarios Transformadores: retos e ideas innovadoras, que recolle as comunicacións e pósters das xornadas.
  • Certificamos una nova convocatoria de proxectos de Aprendizaxe-Servizo que se desenvolveron durante o curso 2017/18 nas aulas da UDC.
  • Desde a Unidade de Atención á Diversidade organizamos as III xornadas sobre diversidade na UDC que este ano estivo dedicada ás enfermidades raras “Outra forma de voar”, que tivo unha grandísima acollida, con relatores da talla de Assier de la Iglesia, xogador do Ordizia-Basoa Banaketak, que nos contou a súa experiencia como afectado de Esclerose Múltiple e o seu proxecto
  • Con motivo do Día Internacional das Persoas con Discapacidade, celebrado o 3 de decembro, dende a nosa universidade, encargada da coordinación do Grupo de Comunicación da Red SAPDU dentro de CRUE-Asuntos Estudiantiles, lanzamos a campaña #MasQServicios a través dun vídeo que daba a coñecer o traballo da rede de unidades de atención á diversidade das universidades españolas. A campaña foi froito do traballo colaborativo de toda a rede e recolleuse e editouse en formato vídeo dende a nosa universidade.
  • Un ano máis, o proxecto Espazo Compartido segue a formar a rapazas e rapaces con discapacidade intelectual dentro da nosa universidade. Este ano o alumnado realizou o seu primeiro período de prácticas e comezou a súa andaina no seu segundo e derradeiro ano. Tamen conseguimos o seu recoñecemento como título propio na UDC, o que o asenta como un proxecto estable e unha iniciativa de responsabilidade social dentro do ámbito universitario. O 9 de febreiro deste ano o Campus de Ferrol acolleu a segunda xornada de traballo da rede de programas universitarios para a inserción laboral de persoas con discapacidade, que neste vindeiro 2019 nos levará a Granada.espazo compartido logo

 

Pois este foi, dun xeito resumido, o noso ano 2018. Como non paramos, estamos xa argallando novos proxectos que sacaremos á luz durante o 2019. Esperamos que sexa un bo ano para todos e todas!! unha aperta de todo o equipo do CUFIE!

III Xornadas de Innovación Docente: un ano máis que compartimos, debatimos e aprendimos xuntos.

Hai uns días que remataron as III Xornadas de Innovación Docente da UDC e queremos, coma sempre, compartir con vós os resultados e impresións que fomos recollendo durante os dous días que durou esta edición.

Temos que dicir que en xeral, quedamos coa idea de que este ano melloramos en bastantes aspectos con respecto a edicións anteriores e queremos que saibades que ese optimismo e esa enerxía positiva debémosvola a todos e todas os que asististes. Por iso, e ante todo, MOITÍSIMAS GRAZAS.

20181108_093820
Inauguración oficial das III XID polo reitor Julio Abalde, a vicerreitora Nancy Vázquez e o decano da fac. de CC. da Educación, Manuel Peralbo.

Imos pois cos datos:

  • O programa

Como podedes ver no programa, esta edición – seguindo as vosas suxerencias do ano anterior- tratamos de facela máis dinámica repartíndoa en dous días e reducindo os horarios de tarde. Coidamos que isto facilitou bastante a asistencia.

  • O público

Por outro lado, seguramente grazas ao traballo de difusión no que colaborou moitísimo o noso relator convidado Antonio Fernández-Coca, o número de inscritos incrementouse significativamente respecto de edicións anteriores chegando a superar os 200 inscritos este ano.

  • O relator convidado: Antonio Fernández-Coca

Como era de agardar, a charla do noso convidado non só non defraudou, senón que batiu récords de asistencia con respecto a edicións anteriores e tivo unha grande repercusión, como veremos logo, nas  redes. Isto débese ao inxente traballo transmedia que fixo Antonio programando unha serie de chíos e de vídeos na súa canle de youtube, que ían publicándose secuencialmente segundo avanzaba a súa charla. Xenial!

  • Comunicacións, pósters e paneis de experiencias

Tamén seguindo as vosas suxerencias, aprobáronse un maior número de comunicacións e pósters con respecto a anos anteriores (39 comunicacións, 4 paneis de experiencias e 23 pósters). Asimesmo, agrupáronse as mesas de comunicacións por áreas temáticas para facilitarvos a selección de mesa aos asistentes. O que non logramos foi agrupar todas as mesas nunha soa planta da facultade tal como demandastes na edición anterior. Isto débese a que son días lectivos e dependemos das aulas nas que non haxa clases.

  • GIEncontros

Como novidade nesta edición, integráronse no marco das xornadas os GIEncontros cuxo obxectivo era a posta en común do traballo que realizaron os Grupos de Innovación Educativa da UDC. Coidamos que aquí foi onde tivemos máis problemas de organización debido á masiva asistencia dos integrantes dos GIE que dificultou a xestión dos tempos de intervención de cada un. Temos máis de 70 GIEs rexistrados e só 30 deles confirmaran inicialmente a súa asistencia, sen embargo, acudiron prácticamente a totalidade. Por esta vez, quedámonos con ese dato positivo do interese suscitado por este encontro. O ano que vén, tentaremos organizalo doutro xeito para darvos voz a todos os interesados.

20181109_121658
A vicerreitora Nancy Vázquez moderando os GIEncontros

  • Clausura e entrega de diplomas do PFI

Para rematar tivemos un acto moi emotivo onde o director do Cufie, Enrique de la Torre e a Vicerreitora Nancy Vázquez entregaron os diplomas aos profesores noveles que remataron con éxito o novo plan bianual de formación en modalidade integramente virtual posto en marcha polo Cufie. Parabéns a esa nova canteira docente da UDC!!

Dous días pois cargados de experiencias e emocións que sempre nos deixan un pouso de tristura cando rematan e unha inmensa ansia de superación para a seguinte edición.

Aquí podedes ver todos os chíos deses dous días en Twitter: https://twitter.com/i/moments/1060167535096745984 cos que logramos 7.700 impresións. Tamén en Facebook, a nosa páxina gañou 10 seguidores  novos durante a semana das Xornadas.

Para rematar, velaquí os resultados da enquisa de valoración que moi amablemente cubristes moito/as do/as asistentes:

Coma sempre, ficamos moi atentos aos resultados e aos comentarios e suxerencias que nos facedes chegar. Unha aperta e ata as próximas xornadas!!

 

 

Docencia, paixón e vocación: a receita do éxito de Antonio Fernández-Coca

Un-café-con-Banner

O protagonista do noso café de hoxe é Antonio Fernández-Coca, convidado de excepción que impartirá a conferencia plenaria das III Xornadas de Innovación Docente da UDC do próximo día 8 de Novembro.

antonio-whatsapp1-290x290Profesor titular da área Expresión Gráfica en Arquitectura, doutor en informática na Universitat de les Illes Balears (UIB), mestrado europeo en imaxe de síntese e animación por ordenador (MA ISCA) e licenciado en Belas Artes, exerce como docente, ilustrador e ademáis, como Vicerreitor de Campus Dixital e Transmedia da UIB.

Pero nós queremos que coñezades ao auténtico Antonio que hai detrás de todos eses títulos:  un xoven de 52 anos recén cumpridos de orixe xerezana, criado en Sevilla, orgulloso neto de artesán zapateiro, inquedo, bulideiro, creativo, innovador, multidisciplinar e transversal, que pon tal paixón a todo o que fai que é imposible non contaxiarse da enerxía que irradia.

Nesta súa páxina el mesmo fai un resumo do seu interesante periplo de vida e das dificultades que tivo que enfrontar ante a drástica reducción horaria que sufriu a materia que imparte co plan Bolonia.

Baixo o título “Hay que salir del armario para entrar en el armario: diario de una experiencia docente innovadora” compartirá con vós as claves da súa premiada e recoñecida estratexia Docencia 4.0 (360º), toda unha filosofía docente que vai moito máis alá do mero uso das TICs na aula como potencial estímulo de cambio. Velaquí un breve adianto do que nos vai contar:

Alén diso, aquí queda unha proba máis de que o noso convidado é quen de demostrar con tan só 3 palabras (Docencia, paixón e vocación) e 1 minuto de vídeo, que a súa conferencia vai marcar un punto de inflexión para todo/as aqueles que levades tempo á procura dun cambio de rumbo na vosa docencia:

Tan só quedan dous días para inscribirse gratuitamente AQUÍ, vémonos na Facultade de CC. da Educación o próximo 8 de novembro!

Programa completo das III Xornadas de Innovación Docente

2017: Resumo dun ano cheo de proxectos

2017: Un ano máis que chega á súa fin e toca facer balance da actividade do noso equipo durante estes 365 días intensos.

É certo que rematamos o ano algo cansos, pero moi satisfeitos de todos os proxectos que sacamos adiante, da cantidade de persoas que unistes os vosos esforzos aos nosos para levalos a termo e da cálida e agarimosa resposta que sempre nos brindades a todo o que facemos.

Imos facer un reconto breve das actividades e proxectos que sacamos adiante ao longo deste ano:

  • Planos de Formación: fíxose un remodelado bastante importante suprimindo cursos que xa levaban anos impartíndose e substituíndoos por outros novos e de temáticas máis actuais, facendo ademáis unha aposta firme pola formación en liña.
  • Aos nosos propios plans de Formación hai que engadir outras actividades formativas nas que colaboramos como: ciclos de xornadas para alumnado de doutoramento ou cursos en liña para investigadores en colaboración coas bibliotecas (no 2017 lanzouse a 3ª edición con máis de 100 matriculados).
  • Abrimos novas canles de comunicación para estar máis preto de vós: este mesmo blog, conta en instagram, canle en youtube e presentacións en slideshare. Con todas elas complementamos as xa habituais que son a nosa web, facebook e twitter.
  • Estreamos aula de formación con 25 equipos novos no Edif. Xoana Capdevielle

  • Organizamos o curso de verán Docentes conectad@s, que nos deu ocasión para intercambiar coñecementos e experiencias con docentes de distintos niveis educativos e con destacadas personalidades do ámbito da innovación educativa coma Jordi Adell, Alexandre Sotelino, Fátima García, Wicho, Xacobo de Toro, Xosé M. Viñas, Conchi Fernández e moitos máis. Docentes conectad@s: o reto de educar na era dixital
  • Celebramos as II Xornadas de Innovación Docente para poñer en común as experiencias máis innovadoras que se están a poñer en práctica nas nosas aulas. Como novidade, sacaremos o vindeiro ano un libro dixital para recollelas todas e darlle así maior visibilidade ao voso traballo.
  • Organizamos tamén unha xornada sobre ocio, turismo e diversidade funcional que tivo grande éxito de acollida. 
  • Sacamos unha nova convocatoria de Innovación docente en Aprendizaxe-Servizo na que foron certificados 16 interesantes proxectos.
  • Presentamos a I convocatoria de Grupos de Innovación Educativa (GIE) da UDC con grande acollida pola vosa parte: 79 GIEs rexistrados con 550 integrantes.
  • Renovamos Espazo Compartido, o Programa de Formación Sociolaboral para Persoas con Discapacidade Cognitiva da Universidade da Coruña, cuxo proxecto presentamos á convocatoria de axudas para programas universitarios de formación para emprego a xoves con discapacidad intelectual da Fundación ONCE xunto con outras 21 universidades e no que obtivemos a máxima puntuación.

Pois este sería un resumo deste 2017 que remata. Agardamos continuar mellorando e poñendo en marcha máis proxectos coa mesma ilusión o vindeiro ano. Algún está xa “no forno”  e coidamos que vos vai gustar moito 😉 pero deixamos a sorpresa para o ano que vén!!