III Xornadas de Innovación Docente: un ano máis que compartimos, debatimos e aprendimos xuntos.

Hai uns días que remataron as III Xornadas de Innovación Docente da UDC e queremos, coma sempre, compartir con vós os resultados e impresións que fomos recollendo durante os dous días que durou esta edición.

Temos que dicir que en xeral, quedamos coa idea de que este ano melloramos en bastantes aspectos con respecto a edicións anteriores e queremos que saibades que ese optimismo e esa enerxía positiva debémosvola a todos e todas os que asististes. Por iso, e ante todo, MOITÍSIMAS GRAZAS.

20181108_093820
Inauguración oficial das III XID polo reitor Julio Abalde, a vicerreitora Nancy Vázquez e o decano da fac. de CC. da Educación, Manuel Peralbo.

Imos pois cos datos:

  • O programa

Como podedes ver no programa, esta edición – seguindo as vosas suxerencias do ano anterior- tratamos de facela máis dinámica repartíndoa en dous días e reducindo os horarios de tarde. Coidamos que isto facilitou bastante a asistencia.

  • O público

Por outro lado, seguramente grazas ao traballo de difusión no que colaborou moitísimo o noso relator convidado Antonio Fernández-Coca, o número de inscritos incrementouse significativamente respecto de edicións anteriores chegando a superar os 200 inscritos este ano.

  • O relator convidado: Antonio Fernández-Coca

Como era de agardar, a charla do noso convidado non só non defraudou, senón que batiu récords de asistencia con respecto a edicións anteriores e tivo unha grande repercusión, como veremos logo, nas  redes. Isto débese ao inxente traballo transmedia que fixo Antonio programando unha serie de chíos e de vídeos na súa canle de youtube, que ían publicándose secuencialmente segundo avanzaba a súa charla. Xenial!

  • Comunicacións, pósters e paneis de experiencias

Tamén seguindo as vosas suxerencias, aprobáronse un maior número de comunicacións e pósters con respecto a anos anteriores (39 comunicacións, 4 paneis de experiencias e 23 pósters). Asimesmo, agrupáronse as mesas de comunicacións por áreas temáticas para facilitarvos a selección de mesa aos asistentes. O que non logramos foi agrupar todas as mesas nunha soa planta da facultade tal como demandastes na edición anterior. Isto débese a que son días lectivos e dependemos das aulas nas que non haxa clases.

  • GIEncontros

Como novidade nesta edición, integráronse no marco das xornadas os GIEncontros cuxo obxectivo era a posta en común do traballo que realizaron os Grupos de Innovación Educativa da UDC. Coidamos que aquí foi onde tivemos máis problemas de organización debido á masiva asistencia dos integrantes dos GIE que dificultou a xestión dos tempos de intervención de cada un. Temos máis de 70 GIEs rexistrados e só 30 deles confirmaran inicialmente a súa asistencia, sen embargo, acudiron prácticamente a totalidade. Por esta vez, quedámonos con ese dato positivo do interese suscitado por este encontro. O ano que vén, tentaremos organizalo doutro xeito para darvos voz a todos os interesados.

20181109_121658
A vicerreitora Nancy Vázquez moderando os GIEncontros
  • Clausura e entrega de diplomas do PFI

Para rematar tivemos un acto moi emotivo onde o director do Cufie, Enrique de la Torre e a Vicerreitora Nancy Vázquez entregaron os diplomas aos profesores noveles que remataron con éxito o novo plan bianual de formación en modalidade integramente virtual posto en marcha polo Cufie. Parabéns a esa nova canteira docente da UDC!!

Dous días pois cargados de experiencias e emocións que sempre nos deixan un pouso de tristura cando rematan e unha inmensa ansia de superación para a seguinte edición.

Aquí podedes ver todos os chíos deses dous días en Twitter: https://twitter.com/i/moments/1060167535096745984 cos que logramos 7.700 impresións. Tamén en Facebook, a nosa páxina gañou 10 seguidores  novos durante a semana das Xornadas.

Para rematar, velaquí os resultados da enquisa de valoración que moi amablemente cubristes moito/as do/as asistentes:

Coma sempre, ficamos moi atentos aos resultados e aos comentarios e suxerencias que nos facedes chegar. Unha aperta e ata as próximas xornadas!!

 

 

Reporte das II Xornadas de Innovación Docente e un pouco de autocrítica

O pasado venres día 27 de outubro, celebramos na Facultade de CC. da Educación a segunda edición das Xornadas de Innovación Docente organizadas polo Cufie.

Estamos contentos porque este ano incrementáronse notablemente tanto a cifra de inscritos coma a de propostas de comunicacións e pósteres por parte do/as noso/as docentes. Isto é para nós un indicador claro do interese que despertan este tipo de iniciativas e lévanos a pensar que imos polo bo camiño no que ao fomento da innovación docente universitaria se refire.

Nesta ocasión, tamén os medios se fixeron eco do evento con unha entrevista ao noso director, Enrique de la Torre, que podedes ler AQUÍ.

Nesta ligazón vos deixamos algunhas fotos de como se desenvolveu a xornada:
http://slide.ly/view/db79cff48d192145a916ae1154a9f500

Sempre que organizamos este tipo de eventos nos quedamos coa mellor parte de todas que é o afecto e o cariño que nos amosades todas as persoas que asistides. Para nós ese calor supón unha impagable inxección de enerxía positiva que nos impulsa a seguir. Así vos dábamos as grazas nas redes sociais ao día seguinte das Xornadas:

grazas

Pero sempre hai cousas que mellorar e para iso, debemos agradecervos tamén a participación na enquisa de valoración e, sobre todo, as útiles suxerencias de mellora que algúns nos fixestes chegar. Aquí podedes ver os resultados:

 

En conclusión, faise evidente que debemos mellorar cando menos nos seguintes aspectos:

  • Diminuir a diferencia entre número de inscritos e asistentes.
  • Buscar fórmulas para poder aceptar máis pósteres, así como mellorar o espazo para a súa exposición.
  • Favorecer a asistencia ás comunicacións simultáneas con melloras como:
    • Agrupalas por temáticas ou áreas de coñecemento
    • Situar as distintas mesas en aulas cercanas dentro da mesma planta para facer máis doado o cambio de mesa aos interesados.
  • Dar máis difusión ás Xornadas 
  • Publicar os resumos antes da celebración das Xornadas para que as persoas asistentes poidan saber que comunicacións ou pósteres son do seu interese.

Tomamos nota para seguir mellorando e esperamos contar con todos vós o ano próximo!

Publicada a I Convocatoria de Grupos de Innovación Educativa da Universidade da Coruña

Inauguramos curso académico con unha nova iniciativa que, sen dúbida, será de grande interese para o noso profesorado e para o persoal investigador: a Vicerreitoría de Oferta Académica e Innovación Docente, en colaboración co CUFIE, acaba de lanzar unha convocatoria para a constitución e recoñecemento de Grupos de Innovación Educativa (GIE).

Os obxectivos que se perseguen son os seguintes:

  • Promover a participación do profesorado en accións de innovación educativa.
  • Fomentar o traballo colaborativo e interdisciplinar mediante asociacións estables de profesores que favorezan a actualización permanente e o desenvolvemento profesional docente.
  • Darlles unha maior proxección e difusión ás actividades de innovación educativa da UDC para adquirir unha maior presenza nos foros educativos nacionais e internacionais.
  • Mellorar o impacto dos procesos de ensino-aprendizaxe e, en xeral, a calidade do ensino impartido na UDC.

Todos os detalles desta convocatoria pódense consultar na sede electrónica da UDC e nesta ligazón á nosa web: http://www.udc.es/cufie/INNOVACION/GIE/IConvocatoria.html 

Como avance, deixámosvos aquí recollidas na seguinte infografía as 5 cuestións clave sobre os GIE. Esperamos que sexa un éxito!

GIE-Infografia

Docencia e propiedade intelectual: que materiais podemos usar legalmente na docencia universitaria?

profesora-enliña

Este artigo é unha adaptación (máis ben debemos dicir unha traducción ao galego) dunha guía publicada polo CENT da Universidade Jaume I titulada Docència i propietat intellectual. Quins materials puc utilitzar legalment en la docència universitària? baixo licenza de atribución.

Como é de todos sabido, o profesorado das universidades españolas debe aterse escrupulosamente á Lei de Propiedade Intelectual cando publica materiais de aprendizaxe na súa aula virtual, baixo ameazas de cuantiosas multas cando se produce incumplimento dos termos da dita Lei.

Por esta razón, ante as numerosas dúbidas que lle xorden ao noso profesorado, presentamos aquí tanto as nocións básicas que cómpre coñecer sobre a propiedade intelectual, coma os tipos de materiais que podemos empregar legalmente na nosa docencia. Vaia o noso agradecemento ao equipo do profesor Jordi Adell, director do CENT, pola súa xenerosidade ao licenzar este material e tamén á profesora Linda Castañeda por publicar a tradución ao castelán no seu blog. Seguir lendo

Docentes conectad@s: o reto de educar na era dixital

Docentes conectad@s: o reto de educar na era dixital

Docentes contectad@s: o reto de educar na era dixital é o título do curso de verán organizado polo CUFIE que se vai celebrar os días 10 e 11 de xullo na Facultade de CC. da Educación do campus de Elviña.

A nosa intención foi crear un punto de encontro, unha ocasión para reunir a docentes de niveis educativos diferentes para debater, poñer en común ideas e proxectos e crear sinerxias que lles permitan traballar xuntos arredor dos novos paradigmas educativos que están a xurdir no contexto da era dixital e conectar as aulas coas necesidades dunha sociedade en permanente cambio.

Titulámolo Docentes conectad@s para facer fincapé na necesidade de establecer conexións e de tecer fíos entre os distintos actores implicados na construción dunha educación de calidade:

  • Conexión das aulas con unha sociedade cambiante que esixe unha actualización permanente das metodoloxías e das ferramentas coas que se densenvolve a docencia.
  • Conexión do/as docentes entre sí, porque a calidade do ensino na era dixital pasa ineludiblemente polo traballo colaborativo e a creación de redes de profesionais que aprendan xuntos compartindo coñecemento.
  • Conexión docentes-alumnado a través de ferramentas, estratexias didácticas e metodoloxías activas que poñan ao alumnado no centro do proceso de ensino-aprendizaxe.
  • Conexión docentes-tecnoloxía educativa que posibilite a mellora e actualización da competencia dixital docente.

Seguir lendo